तुझे चांदण्याचे हात
देती मला साथ
सदोदित

तुझे चंदनाचे हात
वाटतो आधार
जीवनाचा

तुझे सौहार्दाचे हात
रचिती सतत
सौख्यराशी

तुझे हात मृदुतर
घालती फुंकर
दुखा:वर

तुझे कळ्यांचेच हात
दिवसाही भास
चांदण्याचा

तुझे प्राजक्ताचे हात
करिती विरक्त
आसक्तीतुन

तुझे स्निग्ध मधु-कर
बरसती सदा
शांतिरस

तुझे कांचनाचे हात
दाविती प्रभात
सोनियाची

तुझ्या तृप्त, करतळी
द्रौपदीची थाळी
वसतसे

तुझे हात परिपूर्ण
दुजे काय वर्ण
निरूपमे?