आज पश्चिमा घेऊन आली
रंगाची माधुरी,
विविधरंगी विणते शेला
माया जादूगरी

जादू कसली वस्त्र अनोखे
भासे हे भरजरी,
निळीशार ती कडा नभाची
गमते सरोवरी

सरोवरी त्या डोलत होती
रक्तवर्ण कमळे,
रंग-केशरी, सोनल पिवळे
भासे केशर मळे

ढगामधूनी आकारत होती
मुग्धमृगी सावळी,
हरीण बावरे चौखुर उधळित
माती-लाल-पोवळी

त्या रंगाचे तरंग उठती
अजून अंतरात,
संध्यारंगी रंगून जाता
होते मग रात

फेर धरोनी नाच नाचते
रंगाची माधुरी,
श्रीरंगाची ऐकू येते
मंदमधुर पावरी !