दासाचा मी दास होऊनी, तुझिया दारी आलो
समर्था, पावन मी झालो...

जन्मानंतर सर्वाआधी
माय-पाश हे बंध जिवाचे,
बंधमुक्त हा जीव कराया

उन्मन मी झालो...

बाल-युवा या, क्षुद्र उपाधी
या देहाच्या प्रपंच-व्याधी,
व्याधीमधुनी मुक्त व्हावया

आतुर मी झालो...

जन्मभरीचे पाप हराया
राम-नाम तव आम्हा लाभले
नामजपाचे माहात्म्य देखुन

विनम्र मी झालो...

रामनाम हे नाम जपाया
दासाआधी, नाम घ्यावया
समर्थ तुमच्या सिद्धकृपेने

पुनीत मी झालो...

तव नामाच्या पुण्यप्रभावे
या देहाची नुरली-व्याधी
आधिव्याधीरहित अंती

मुक्त मुक्त झालो...