क्षितिजावरती आज देखिले
चित्र नवे देखणे,
सृष्टीचे अद्भुत ते लेणे

रविबिंबासह लाल लाल ती
रक्तवर्णी हो कडा,
मुग्ध उषेच्या लज्जेस्तव का
कलंडला ग घडा?

सानंदे मग नभी उडाला
विहंगमेळा खुळा,
मंदसुगंधित वायूलाही
झणी लागला लळा

तरुवेलीसह भान विसरूनी
निर्झर गाई गाणे
सृष्टीचे अद्भुत ते लेणे १

रविबिंबासह धुके विरळ हो
अवर्णनीय शोभा,
चैतन्याच्या रसात न्हाली
सुवर्णमय ती प्रभा

उषः प्रभेच्या स्वप्नमिलनी
शुभमंगल ही घटी
वातावरणी भरून राहे
आनंदी केणे
सृष्टीचे अद्भुत ते लेणे २